8.వృశ్చిక రాశి ఫలితములు

విశాఖ 4వపాదము,అనూరాధ 1,2,3,4 పాదములు, జ్యేష్ఠ1,2,3,4 పాదములు

        ఆదాయం - 2              వ్యయం - 3

        రాజపూజ్యం -1            అవమానం - 2

        ఈ రాశివారికి  2016 ఆగస్ట్ 11 వరకు గురుడు 10ట లోహమూర్తి, తదుపరి వత్సరమంతయును 11ట సువర్ణమూర్తి, శని సంవత్సరాది నుండి 2017 జనవరి 26 వరకు1ట లోహమూర్తిగానూ, తదుపరి 2ట వత్సరమంతయు రజితమూర్తి. రాహువు10, కేతువు 4ట సువర్ణమూర్తులు.

          వీరికి సంవత్సర ప్రారంభము నుండి సంవత్సరాంతము వరకు గురుబలం కలదు ఏల్నాటి శని జన్మ, కుటుంబ స్థానములలో సంచార దోషం. రాహువు రాజ్యస్థాన సంచారం. కేతువు అర్ధాష్టమ స్థానసంచార దోషం. వీరు గురుబలముచే ఎంతటి కార్యములనైన పూర్తిచేయగలరు. మానసిక ఆనందం, ధనలాభం, శని దోషముచే స్థానచలన సూచనలు, ఆరోగ్యలోపం,కుటుంబపోరు, ధననష్టం. రాహు దోషముచే  అనవసర వాదనలు, పూర్తి కావలసిన పనులు వాయిదాపడుట. కేతు దోషముచే మాతృ వంశమువారితో స్పర్ధలు, ధననష్ట, సుఖలోపం, వ్యవసాయదారులకు రెండు పంటలు కలిసివచ్చును. ఉద్యోగస్తులకు, అధికారులకు ప్రశంసలు. విద్యార్థులు ఉత్తమ ఫలితాలు సాధించగలరు. రాజకీయనాయకులు ప్రజామన్ననలు పొందగలుగుదురు. వ్యాపార, వైద్య, వైజ్ఞానిక, మత్స్య, పౌల్ట్రీ, పాడిపరిశ్రమ, కళారంగముల వారికి, క్రీడాకారులకు ప్రోత్సాహము కలిగి లాభములను పొందుదురు.

          ఈరాశివారికి గురుడు సంవత్సరాది నుండి ఆగస్ట్11 వరకు రాజ్యగురుడు తదుపరి సంవత్సరాంతము వరకు లాభస్థానగురుడు, శని సంవత్సరాది నుండి 2017 జనవరి26 వరకు జన్మశని దోషం. రాహువు సంవత్సరాది నుండి సంవత్సరాంతము వరకు దశమస్థాన సంచారం. కేతువు సంవత్సరాది నుండి సంవత్సరాంతము వరకు తృతీయస్థాన సంచారం. ఈ కాలములో ధనలాభం, ప్రశంసలను మన్నలను పొందుదురు. శని జన్మరాశి సంచారకాలంలో స్థానచలన సూచనలు. అనారోగ్యం,ధననష్టం, రాహువు రాజ్యస్థాన సంచారంచే ధనలాభం, కేతువు తృతీయస్థాన సంచారముచే మానసిక విచారం, దుఃఖం, సోదరహాని. ఈ రాశివారికి శుభాశుభ మిశ్రమం. వ్యవసాయదారులకు రెండుపంటలు కలసివచ్చును. అవివాహితులకు వివాహప్రాప్తి. గృహ నిర్మాణములు పూర్తియగును. దైవకార్యములందు పాల్గొనెదరు. శని, ద్వాదశ, జన్మరాశి సంచారకాలములో  ఆరోగ్యభంగము, త్రిప్పట, స్థానచలన సూచనలు, అకారణ విరోధములు,మనస్థిమితము లేకపోవుట,అన్నిరంగాలవారికి పోటీతత్వము  ఎదురగును. రాహుబలముచే కొంత ధనార్జన, కేతువుచే మానసిక విచారం.

         ఈ రాశివారికి అదృష్టసంఖ్య – 9. 1,2,3,4 తేదీలు సంఖ్యలు. ఆది,సోమ,మంగళ,గురువారములు కలిసిన యోగదాయకము. ఆశ్వరునికి తైలాభిషేకం, శనివార నియమాలు పాటించుట, ఆంజనేయ, విష్ణుస్తోత్ర పారాయణ చేసిన మేలు. శనిదోషము తొలగుటకు సుబ్రహ్మణ్య, పార్వతీ ఆరాధనలు, చండీపారాయణ ఆచరించిన మేలు.


 

నెలవారీ ఫలితములు

ఏప్రిల్: నెలలో ఉత్తరార్థం అనుకూలం. ముఖవర్చస్సు, యత్నకార్యసిద్ధి, శరీర సుఖసౌక్యములు, సంతోషము, వస్త్ర, ధాన్య లాభములు వృద్ధి. జన్మరాశి యందు కుజ శనుల సంచారం జరుగుచున్ననూ ధనలాభము, మనస్సున ధైర్యము, విద్యలచే వినోదము.

మే: జన్మకుజ సంచారముచే ఉష్ణ జ్వరము ఎముకలు కటకటలాడుట, శరీరమున కత్తిచేతగాని, శస్త్రముచేత గాని గాయములు. శరీరమున ఉష్ణసంబంధ కురుపులు వేయును. కాని ధైర్య సాహసములతో పనిచేయుదురు.కార్యసాధకులగుదురు.

జూన్: వృత్తి విషయాలు ప్రోత్సాహకరంగా ఉన్నప్పటికీ చిత్తచాంచల్యమునకు ఇబ్బందులు, వ్యర్ధముగా సంచరించుట, సోమరితనము ఉండును.

జూలై: ఉద్యోగయోగము, దూరప్రాంతములలో కుటుంబమును వదిలి పనిచేయవలసివచ్చుట, ధనలాభము. ఉన్నత విద్యలకై చేయు ప్రయత్నములు ఫలించును. ప్రముఖ విద్యాసంస్థల్లో గుర్తింపు. పదిమందిలో గుర్తింపు, గౌరవము, ఆదరణ కలుగును.

ఆగస్ట్: మిశ్రమ ఫలితములు. ఆర్థిక ఇబ్బందులను ఎదుర్కొంటారు . బయట పడగలుగుతారు. మిత్రుల సహాయము. కమ్మరము, ఇనుము, నువ్వులు, వంటనూనెలు , గ్యాస్ వెల్డింగ్, కాంట్రాక్ట్, స్వతంత్ర వృత్తుల వారికి ఆర్థిక పరిపృష్ఠికలుగుతుంది.

సెప్టెంబర్: వీరికి ఈ మాసములో లాభస్థానమందు నీచోచ్చగ్రహములు. ఆర్ధికంగా లాభిస్తుంది. అయినా జన్మరాశిలో శని సంచారం వలన ఏదో ఒక అనర్థం ఉంటూనే ఉంటుంది. సమయస్ఫూర్తి అవసరం. వ్యాపారస్తులకు ప్రతికూలం. జాగ్రత్త అవసరం.

అక్టోబర్: వీరికి రవి, బుధులు అధిక లాభమును కలుగ చేయుదురు. వ్యాపారములు అనుకూలముమట్టిపనులు, కుమ్మరి, ఇటుక, సిమెంటు, ఇనుము వ్యాపారులకు ధనదాయం పెరుగును. కుటుంబ వాతావరణము అనుకూలముగా ఉండును.

నవంబర్: విద్యావిషయంగా ముందంజ వేసే సమయమిది. పరీక్షలలో కృషిచేసి రాణిస్తారు. మెదడుకు పదును పెడతారు. గతంలో చేసిన ఋణాలు తీర్చుకునే అవకాశం వస్తుంది. ధనాదాయం పెరుగుతుంది.

డిసెంబర్: బంధువుల గురించి బాగా ఆలోచిస్తారు. అంతర్మధనం చెందుతారు. కుటుంబ సభ్యల ప్రవర్తనకు నొచ్చుకుంటారు. స్మశాన సందర్శనం, భూమి, ఇండ్లపై ఆదాయం బాగా వస్తుంది. భూ, గృహమార్పులు. వ్యవసాయదారులకు ఆర్థికలాభం విద్యార్థులకు మనోవికాసము, బుద్ధి కుశలత గల్గి విద్యావిషయమై ముందంజ.

జనవరి:జ్ఞానసముపార్జన వృద్ధికలుగుతాయివ్యవహార ప్రతిబంధకాలు మరియు ఇతరత్రా కొన్నిరకాల చికాకులు ఎదుర్కోక తప్పదు. గృహ వాతావరణం చాలా అనుకూలము. కుటుంబసౌఖ్యము, దానములు చేయుట, భోగభాగ్యాలు అనుభవించుట.

ఫిబ్రవరి: కుటుంబంలో వివాహాలు కలిసి వచ్చే అవకాశం ఎక్కువ. దానికి తగిన కృషి చేస్తారు. ఇంటి గౌరవం గురించి కృషి చేస్తారు. సాంకేతిక, ఇంజనీరింగ్ విద్యలలో పిల్లలు అభివృద్ధి సాధిస్తారు. ఉద్యోగ ప్రయత్నాలు కలిసివస్తాయి.

మార్చి: విద్యార్థులు సమర్థవంతంగా చదివి సరస్వతీ కటాక్షం పొంది పరీక్షలలో విజయం సాధిస్తారు. వేద, జ్యోతిష్య, ఉన్నత విద్య కలసి రావడం, మంచి అవకాశములు ఆదరణ, ఆధ్యాత్మిక భావం ఉన్నతిలోనికి వచ్చుట, సంపూర్ణ దైవబలం . కుటుంబమున పండుగ వాతావరణము నెలకొంటుంది.