11.కుంభ రాశి ఫలితములు

ధనిష్ఠ 3,4 పాదములు, శతభిషం 1,2,3,4 పాదములు, పూర్వాభాద్ర 1,2,3 పాదములు

            ఆదాయ - 8                      వ్యయం - 8

            రాజపూజ్యం - 3                 అవమానం - 5

 ఈ రాశివారికి 2016 ఆగస్ట్ 11 వరకు గురుడు 7ట రజితమూర్తి, తదుపరి వత్సరమంతయును 8ట తామ్రమూర్తి, శని సంవత్సరాది నుండి 2017 జనవరి26 వరకు 10ట సువర్ణమూర్తిగాను , తదుపరి 11ట వత్సరమంతయు సువర్ణమూర్తి, రాహువు 7, కేతువు 1ట లోహమూర్తులు.

వీరికి సంవత్సరాది నుండి ఆగస్ట్ 11 వరకు గురుబలము సామాన్యం. తదుపరి సంవత్సరాంతము వరకు అనుష్టాన సంచారము. మిక్కిలి దోషము, ఆరోగ్యలోపం, స్థాన చలన సూచనలు, ధననష్టం, ఇంటా బయటా విరోధములు, అకారణ కలహాలు. శని రాజ్యస్థాన సంచారం, కార్యనాశనం, మనోవ్యాకులం, గృహనిర్మాణము, భూసేకరణకు చేయు ప్రయత్నములు ఫలించవు. రాహువు సప్తమస్థాన సంచారం భయం, మానసిక, శారీరక ఆందోళనలు, కళత్ర అనారోగ్య సూచనలు.కేతువు జన్మరాశి సంచారం, భయము. స్త్రీ, పురుషులకు పరీక్షాకాలం. శ్రమకుతగ్గ ఫలితము దక్కుట కష్టము.వ్యవసాయదారులకు ప్రతికూలం. విద్యార్థులు శ్రమపడినా ఫలితము పొందలేరు. ఉద్యోగులు శ్రమపడినా పై అధికారులచే మాటలు పడుట. కళాకారులకు, వివిధ వృత్తులవారికి పరీక్షాకాలము. ఈ రాశివారు ఏరంగంలో వారైనను అన్నీ ఆలోచించి ప్రవర్తించుట మంచిది. గురు, శని, రాహు, కేతువులు మిక్కిలి దోషులు.

          చతురతతో నిర్వహణ సామర్థయము పెరుగును. ఆధ్యాత్మిక కార్యక్రమాలలో తరచూ పాల్గొంటారు. భగవత్ దర్శనము కలుగుతుంది. పాడు జనులను సేవిస్తారు. ఆర్థిక లావాదీవీలను చక్కగా నడపగలరుద్వితీయార్థంలో  ముఖకళ తప్పినట్లుంటుంది. చర్మవ్యాధులు, నరఘోష పెరిగినా జయించగలరు. గృహమున ఆనందకర వాతావరణం. వంశోద్ధారకులను చూసి మురిసిపోతారు. మనోవ్యాకులతో, దుఃఖము వలన పరితాపం, దోషము. ఉద్యోగ, వృత్తి విషయాల్లో ఇబ్బందులెదురైనా  పట్టుదలతో నెగ్గుకు రాగలరు.

          2017 ప్రారంభము నుండి గత కాలములో నిలిచిన కార్యములన్నియు సిద్ధించుట, హుషారు, శారీరక, మానసిక ఆరోగ్యము, ద్రవ్యలాభము, స్త్రీ, పుత్ర సుఖ వర్ధనం, సంతానం  వృద్ధిలోనికి వచ్చుట, ఇష్ట కార్యసిద్ధి, మనోనిర్మలత్వం కలుగును.

తరచూ భార్యాపుత్రులతో జగడము, రోగబాధ, కుటుంబమును వదిలి విదేశములందు సంచరించుట, త్రిప్పట, నీచపనుల ద్వారా ధనమును సంపాదించాలనే కోరిక, వ్యవహార ప్రతిబంధకములు, చర్మ, అంటువ్యాధుల బారిన పడటం, వ్యర్థముగా రాకపోకలు సాగించుట, చేతులకు, కాళ్ళకు జబ్బులు, పై అధికారులను దర్శించుట ద్వారా కార్యసిద్ధి, కోపము, శిరోవేదన, అగ్నిభయము, నరముల నిస్సత్తువ కలుగును.

ఈ రాశివారికి అదృష్టసంఖ్య 8. 2,3,6,9 తేదీలు. సంఖ్యలు మంగళ, శుక్ర, సోమవారాలు కలిసిన మరింత మేలు. గురుదోష నివారణకు శివాభిషేకములు. శివస్తోత్ర, దత్తాత్రేయ స్తోత్రపారాయణ, గురువార నియమములు.శనిదోషనివారణకు శివాభిషేకములు, శివ,ఆంజనేయస్తోత్ర పారాయణలు, శనివార నియమములు, శివ దర్శనములు ఆచరించవలెను. రాహు, కేతు దోష నివారణకు శుక్ర, మంగళవార నియమములు, సుబ్రహ్మణ్యారాధన, దేవీస్తోత్ర, చండీపారాయణలు ఆచరించిన మేలు.


 

నెలవారీ ఫలితములు

ఏప్రిల్: నీచ పనులకు పాల్పడుట. వ్యక్తులతో అంతంత మాత్రంగా వుండుట మంచిది. నిత్య సంతోషము, ఆరోగ్యము, బంధుమిత్ర సమాగమము, ధనలాభము, ఉత్తరార్థంలో మేలు. మానసికోల్లాసనము, ధనప్రాప్తి, పుత్రసౌఖ్యము, ఇష్టకార్య సిద్ధి.

మే: క్రమశిక్షణతో కార్యసాధన. ఇతరులకు తగిన పని కల్పించి లాభము పొందగలరు. సత్సంభాషణ. గంభీర్యమును ప్రదర్శించగలరు. పదిమందిపై అధికారమును ప్రదర్శించుట, చెలాయించుట జరుగును.

జూన్: బంధు విరోధము, మనస్థాపము, బుద్ధిజాడ్యము, మతిమరుపు. జన్మరాశిలో కేతువు మిశ్రమఫలితం. ఆధ్యాత్మిక, దైవిక శక్తులను పెంపొందించుకుంటారు. కొన్ని విషయాలలో గ్రంథపఠనాశక్తి పెరుగును. గృహసౌఖ్యం, గృహమును ఏర్పరుచుకొనుట.

జూలై: సంతానం వృద్ధిలోకి వచ్చుట, వారి తెలివితేటలు, మేధాశక్తిని నిరూపించుకొనే అవకాశములు ఫలిస్తాయి. దేశంలో ఉన్నతవిద్యా స్థానాలలో విద్యావకాశం, వ్యవసాయదారులకు వృద్ధి జరుగుతుంది.

ఆగస్ట్: ఉత్తరార్థంలో అనారోగ్యం, శ్వాసకోశ సంబంధ పరీక్షలు, వైద్యుల సలహాలు తీసుకుంటారు. అమృతఘడియాలలో ఔషధ సేవనం మంచిది. దైవానుగ్రహం ఉంది. కుటుంబ వాతావరణం ప్రోత్సాహకరం. నెలలో రెండవభాగం బాగుంటుంది.

సెప్టెంబర్: కొన్ని విషయాలలో యితరులను శాసించి  వ్యవస్థను గాడిలో పెట్టగలరు. క్రింది, పై  అధికారులతో సంప్రదింపులు జరుపుచూ సత్సంబంధాలను కొనసాగిస్తారుశ్వాసకోశ వ్యవస్థకు సంబంధించిన పరీక్షలు, చికిత్సలు పొందడం, ప్రమాదం ఉండదు.
అక్టోబర్: సమస్త సంపదలు, ధనధిక్యత, శుభకార్యాచరణ, విశేషమైన కార్యాలలో పాల్గొనుట, దైవ సాన్నిధ్యాన్ని పొందుతారు. మీరు చేసే పనులకు విశేషమైన ఆదరణ,గుర్తింపు, సమాజంలో గొప్ప వ్యక్తులతో పరిచయములు. అందరి మన్ననలు, ప్రశంసలు.

నవంబర్: ఆధ్యాత్మిక క్షేత్రాలను సందర్శిస్తారు. నిశ్చలమైన దైవభక్తికి మార్గం  ఏర్పడుతుంది. వేదపఠన,శ్రవణమును ఆస్వాదిస్తారు. పునీతులవుతారు. వ్యాపారస్తులకు కలసివస్తుంది. విద్యార్థులు  శ్రమ పడవలసి వస్తుంది. సోమరితనము విడనాడాలి.

డిసెంబర్: స్వల్ప అనారోగ్యం. జలుబు, శ్లేష్మ సంబంధ, శ్వాసకోశ సంబంధ చికిత్సలు. వృత్తి, వ్యాపారాలు లాభిస్తాయి. రియల్ ఎస్టేట్ వ్యాపారాలకు బాగా కలసి వస్తుంది. విద్యార్థులు విజయం సాధిస్తారు. పట్టుదలతో కార్యసాధన చేయగలరు.

జనవరి: మొదటి వారములో  ధనాదాయము. నెలాఖరులో ధనవ్యయము. సంగీత, నృత్య, కార్యక్రమాలలో పాల్గొంటారు. ఆర్ధిక పరిపుష్టి,కుటుంబ సౌఖ్యము, ఇష్టదేవత  సందర్శనము. ఆధ్యాత్మిక కార్యక్రమాల్లో పాల్గొంటారు.

ఫిబ్రవరి: వ్యవసాయ రీత్యా ఆదాయం . తగిన ధనవ్యయం. అష్టమ స్థానంలో గురుడు వక్రించుటచే దోషపరిహారార్థం గురువారం శెనగలు దానం చేయుట.ఆరోగ్యం కుదుట పడును. కుటుంబ సభ్యుల ఆడంబరములకై ధనవ్యయము, వినోద కాలక్షేపములు.

మార్చి: పనుల ఒత్తిడి, తొందరపాటు చర్యలు, ఆందోళన  ఒక్కోసారి తీవ్ర కోపము, అనాలోచిత నిర్ణయాలు, జన్మరాశి యందు కేతువు ఆధ్యాత్మిక శక్తిని పెంపొందించును. సోదర మూలక సహాయము, అభివృద్ధికలుగుతుంది.